عشان انا بنت!!!

أنثى!!
وأنا لا اكره حقيقتي كأنثى وقد تعلمت منذ كثير التعايش معها

أنثى ولمن لا يعلم فقد احببتها وعشقت كل ما وهبها الله اياه مما لا يقدر عليه كثير ممن ولدوا ذكورا ولا اجد فيهم ما يكفيني لأطلق عليهم رجال

أنثى تعلمت ان تفرق بين ساحات المعارك والتحدي وبين مملكة الانثى
وتعلمت بالخبرة او بالطبيعة متى تضع عنها دروعها الحديد وترتدي زي الاماء او الاميرات

كويس

المقاتلة والانثى انفصلا ولكل منهما دورها

كويس

لكن لما الانثى دي تبتدي تخنقني وتقوللي لأ
يبقى لأ والف لأ

بس حقيقي انا متضايقة
يعني انا اروح اقدم واتقبل واتمشور واروح حتت ماروحتهاش قبل كده وما اعرفش بتتراح ازاي
ومركز اعداد قادة وستاد القاهرة وستاد السلام والبطولة فاضل عليها كام يوم
وجي سي ودوبينج كونترول سنتر وبرستيج بقى
وسي في ايتم جامد موووووووووووت
وكل ده يروح مني عشان خاطر الانثى دي
يبقى ااااااااااااااااااااااااااااااااااااااااااااااااء

ليه لو واحد شاف بنت مروحة الساعة اربعة الفجر هيقول انها اكيد يا كانت بتصيع يا كانت بتصيع؟
مش ممكن تكون كانت في اللجنة المنظمة لكاس العالم للشباب وكانت بتعمل دوبينج كونترول وكانت مضطرة حسب بروتوكول الفيفا انها تقعد ساعتين بعد الماتش اللي حسب بروتكول الفيفا هيبتدي تسعة ونص ويخلص حداشر ونص وممكن يطول لو اتلعب اشواط اضافي في دور الستاشر
ويادوب طلعت النتايج وخدت الباص وجري على بيتهم؟

وانا ليه اخاف وانا عارفة اني مش بعمل حاجة غلط
بالعكس
ده فيه هدف اسمى.. صورة مصر في التنظيم
وهدف مهم.. اتعلم واجرب
وهدف اهم.. الخبرة دي هتفتح لي باب كبير قوي لعالم مختلف اول مرة اشوفه

انا اعرف ولاد كتير يتمنوا مكاني
واعرف بنات اكتر هيروحوا وهيفضلوا هناك ع المواعيد دي

ومش غايظني اني مش هاروح
ومش غايظني ان اهلي اعترضوا
اكتر حاجة غاظتني اعتراض الانثى بداخلي وخوفها
واني استسلمت لها بدرجة مش مدياني حتى فرصة افكر اروح اخد الاي دي بكرة

عاااااااااااااااااااااااااااااااااااااااااااااااااااا

حاجة وحاجة

متأخرة شوية


بس فرحت بيها قوي ساعتها
الصفحة الأخيرة لأول مجلة يتكتب على غلافها
رئيس التحرير/ اسمي
يارب ما تكون الأخيرة

-------------------------------

وبدري شوية

ميديا أو ميديكال
المهم اني نفسي ف تغيير
ونفسي احس اني عملت حاجة مهمة
يارب تمها على الخير

يتم

اتقفل باب البيت :(
وليا مين من بعدك اتسند علي دعوته واستخبى في حضنه؟
لله ما اعطى وما أخذ

التعلق والفقد

البوست ده طويل حبتين و شخصي قوي
شكلي كده كاتباه بأرثي لحالي
:((
ــــــــــــــــــــــــــــــــــــــــــــــــــــــــــــــــ
لأني بأتعلق بالناس بسرعة جدا
وبتعلق بالأماكن كمان بسرعة جدا
وبأحب الاشياء بسرعة جدا

تحولت حياتي الى سلسلة لا منتهية من حوادث التعلق والفقد

لما سبت مدرسة ابتدائي فضلت اروح المكتبة بتاعتها طول فترة اعدادي
ولما سبت مدرسة اعدادي اتمزعت بينهم وفي الاخر استقرت نفسي على مكتبة ابتدائي تاني لقربها لنفسي
واما دخلت الجامعة فضلت ازور مدرسيني الى حين قريب
ودلوقت مفتقدة الجامعة حد البكاء
مفتقدة السكاشن وزمايلي

هي صيدلية واحدة اللي اشتغلت فيها لحد دلوقت
وماقدرتش اسيبها مش عشان مستريحة فيها وبس
كمان عشان بقت عاملة زي ما تكون بيتي
وبقى ليا فيها ذكريات كتير وجميلة
و لأسباب أخرى :D

عارفة ان لابد ما يموت شيء عشان يحيا شيء
بس بأتفجع كل مرة

لما استلمت شغلي في الادارة من كام يوم حاولت جاهدة اني ما ادخلش الصيدلية حتى ولا اقعد جواها عشان ما اتعلقش بيها واتعرف ع الناس
وسستمت الناس اني ماشية
ولما مشيت ورجعت وربنا ما ارادش اني اقعد في المستشفى حاولت ااخر نفسي قدر الامكان لأني هأرجع على قعاد لو رجعت وقد امشي وقد لأ فلو هأمشي يبقى امشي على طول من برة برة

وبرضه ربنا ما ارادش

ورجعت واستلمت
وابتدت الحوارات وابتدى التعلق
رانيا شبه شيماء جارتنا زمان
وولاء حتة سكرة
وسهام زي العسل
والكتاب بتاع جودي بنوتة سارة وحواديتها
سارة حامل وعالبا هتولد النهاردة او بكرة عشان هي كان بيجيلها طلق ولو ربنا اراد امشي ما اشوفهاش تاني ابدا
جينا وبنوتتها آن
ومدام فاتن
دكتورة اميمة وتفهمها
واستشعر قرب الفقد

شبطانين فيا في الادارة عشان عندهم نقص في عدد الصيادلة
وانا مش مبسوطة بده
بأتعلق بالمكان وافتقادي ليه ممكن يخليني اتكاسل واستنى
ونفسي ربنا ييسر لي اني امشي بسرعة عشان بدات اتعب نفسيا
مش هينفع اغير حاجة من عاداتي و الحاجات اللي كنت بأعملها عشان وضع مؤقت
ومش هينفع انزل من بيتنا السعة سبعة ونص وارجع تسعة كل يوم من السبت للجمعة
ومش عايزة اسستم نفسي ان ده هيبقى وضع دائم عشان مش عايزاه يبقى وضع دائم
وخايفة استكتر نفسي ع المكان لأن تجاربي السابقة علمتني انك لو كنتي اكبر من المكان ربنا هيوديكي مكانك لكن يوم ما تستكتري نفسك عليه هتفضلي فيه سنين


قلقانة جدا من الزحمة اللي ابتدت تاخدني وتتقطع في وسطها العلاقات الانسانية
وبقول لنفسي ده وضع مؤقت بس حتى ماما اعترضت امبارح
مابقيتش بتشوفني
برجع على مواعيد نومها
بابا شفته صدفة على محطة الاتوبيس من كام يوم
انا معاهم ومش معاهم
برجع افتح الكمبيوتر لحد ما افقد وعيي قصاده وانام

طبعا لوحدك في جانبك المشرق من روحي لم تمس
بس هي المشكلة ان هل ده لأن تواجدك قليل اصلا لدرجة تخليني اتشبث بكل ذرة منه
ولا ده ناتج عن تشبثي الذاتي بيك وبالحلم؟
مش عارفة
بس عارفة اني في عز ما انا مضغوطة كده عندي استعداد اولي اي طلب تطلبه اهتمام كامل مهما كان ترتيبه في قايمة اولوياتي لأن ترتيبك انت على رأس القائمة

وبفكر في مكاني عشانك اكتر ماهو علشاني


وفي عز افتقادي للاماكن والاشياء وانشغالي بحتمية فقدهم عشان يحيا شيء
بأفقد اشخاص المفروض يكونوا دايمين من ثقتي في دوامهم

الاشخاص مش مسلمات
والاشياء مش مسلمات
والاماكن مش مسلمات

يارب ساعدني
انا مش عايزة افقد احساسي بالالم لما افقد الناس عشان ده جزء من انسانيتي اللي ابتديت اخسرها
انا بس مش عايزاه يتسبب في المزيد من الفقد

يارب الوضع المعلق ده ينتهي بقى
:huh:

حاجة

مش عارفة اوصفها ليك انا بس بحسها

فقد

فيما يرى النائم

امبارح حلمت خير اللهم اجعله خير

:)

اني بأشتري دبلتي

والغريب اني لا كان معايا بابا ولا ماما ولا حتى العريس

كان معايا بنوتتين زي القمر
كان باين عليهم في الحلم انهم صاحباتي قوي

وكنا بنهزر ونضحك بصوت عالي قوي

والدبلة كانت دهب ابيض

وصحيت من النوم فرحانة ومرتاحة على الرغم من كوني نمت وانا حاسة اني في كرب بسبب المشاكل اللي عندي في الشغل

وماما قالت لي خير ان شاء الله
ربنا يجعلها سنة بيضا عليكي

:)
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

بسم الله الرحمن الرحيم



عايزة افتكر الايات دي كويس قوي قوي
عشان ما استعجلش زي قبل كده
و عشان انا قلبي بيقولي




صدق الله العظيم